PROFETAS NA SÚA TERRA
Mateo
Fontán Couto
Recentemente
saíu a noticia de que as
dúas imaxes pétreas dos profetas identificados
como Elías e Enoc, procedentes da fachada occidental da Catedral de
Santiago e que se conservan no Museo de Pontevedra, regresarán
temporalmente a Compostela para integrarse no Espazo Divulgativo do
Pórtico da Gloria. Parece pois un bo momento para falar algo destas
xoias medievais que custodiamos na nosa cidade.
Na súa orixe o Pórtico da Gloria era unha estancia
aberta e non pechada cara o oeste como podemos observar na
actualidade. As primeiras modificacións xorden a partir de 1520 co
cegamento dos tres vanos exteriores de acceso, o cal supuxo grandes
modificacións na súa fábrica, como a desaparición das esculturas
que gradaban o acceso á igrexa.
Estas efixies caracterizadas como os profetas Enoc e
Elías son similares entre si: personaxes anciáns de longa
cabeleira; un deles, Elías, acariña a súa longa barba trenzada e
estreita, mentres que na de Enoc móstraxe solta e máis ancha. Ambos
personaxes portan cartelas abertas e actualmente anepigráficas,
aínda que en orixe revelarían a identidade dos seus portadores.
Atópanse descalzos e a súas miradas dirixíanse ao interior do
templo. Cara a 1520 foron desmontadas do arco central da fachada
occidental na que actuaban de xambas e mostrábanse ao visitante como
testemuños da Apocalipse. A factura destas excepcionais esculturas
sitúase sobre 1188 e a súa autoría está vinculada ao taller do
mestre Mateo.
As dúas imaxes graníticas, conservadas no Museo de
Pontevedra, foron mercadas aos Condes de Gimonde en 1956. temos
constancia de outras cinco imaxes procedentes do mesmo lugar. Dúas
atópanse nas escaleiras de diante da fachada do Obradoiro, namentres
que as outras tres pertencen a coleccións privadas.
Conta
o dito que «ninguén
é profeta na súa terra», tras cincocentos anos de ausencia Elías e mais
Enoc o serán novamente e de forma temporal (ata o 30 de marzo) na
cidade da cal saíron.
Para saber máis:
-
VALLE PÉREZ, J. C.: “19. Profetas”, en 75 obras para 75 anos.
Catálogo
da exposición conmemorativa da fundación do Museo de Pontevedra,
Pontevedra, 2003, p.232 (nesta ficha inclúese máis bibliografía).
.jpg)
Comentarios
Publicar un comentario