O Entroido de Monte Porreiro
Mateo Fontán Couto
Á memoria de
Manuel Villaverde Doval
O porco é un dos animais fortemente vinculados co
tempo de Entroido. Xa cedo no calendario, o 17 de xaneiro, día de santo Antón
Abade, en varias localidades galegas prodúcense romarías e poxas coas partes do
comunmente coñecido como porco Antón. Neste día asociado ao santo eremita, que
se representa cun cocho ao seu carón, saen por primeira vez á rúa algunhas
mascaras emblemáticas do país. O marrán goza dun status especial na nosa
sociedade e a algunhas das súas partes dáselle un uso profiláctico.
Mais sobre todo o porco é o principal protagonista na
gastronomía que gozamos durante os días de Entroido. Todo forma parte dun
ritual, iniciado coa matanza do bruto a finais do outono ou principios do
inverno, co propósito de baleirar as despensas antes do prohibitivo tempo de
Coresma. A abundancia toma forma de cocido, lacóns, filloas, etc. Así, a copiosa inxesta de graxa permitirá estar
fortes para o duro traballo que se vén no campo.
No barrio pontevedrés de Monte Porreiro toman ao porco
como o emblema do seu Entroido ou Carnaval. A celebración é unha das grandes
citas que se producen durante o ano e está organizada pola asociación de
veciños “O Mirador”. Aparte da propia experiencia e os datos proporcionados por
algúns informantes, os programas publicados coas actividades da festa resultan
un útil instrumento para coñecermos a pequena historia do Entroido de Monte
Porreiro.
Aínda que se podería falar dalgúns antecedentes
previos, o comezo da década dos noventa supón o inicio deste festexo no
recoñecible barrio da cidade. Entre os actos principais destacaban o Baile
Infantil, que case sempre contaba con “Magel y su orquesta” como amenizador
musical; o Baile de Socios, que se adoitaba celebrar no Pabellón dos Deportes
cara ás 23:00 horas e o Día da Orella e Matanza do Porco, co desfile de
Carnaval no que tomaban parte as comparsas que optaban a tres premios
económicos e que remataba coa queima da representación do Porco na explanada do
campo de fútbol.
De especial significación tiña o Certame de Poesía
celebrado de forma ininterrompida até o comezo do novo século. Nas súas bases
consta que o premio consistía nunha ducia de chourizos, un lacón, unha cacheira
e un diploma acreditativo do evento. A entrega do premio producíase despois do
desfile, no momento antes de “matar ao porco”e no que o autor debía recitar a
composición gañadora diante do animal. Amais, a poesía premiada publicaríase no
folleto do ano seguinte. Os programas reflicten, á súa vez, un interese polas
tradicións e diversas representacións do Entroido galego, dedicando algunhas
páxinas á súa divulgación. Tamén topamos con refráns, cantigas, ladaíñas e
outros textos de índole satírica, co porco como protagonista, que adoitan estar
escritos en galego e poden ir asinados cun alcuño, como ocorre no tradicional
Testamento do Porco que algún ano rubrica “o voso parente” e noutro “o voso amigo Porco Porreiro”.
Co paso do tempo a estrutura deste Entroido de barrio
varia, modificando ou suprimindo algúns actos e engadindo outros novos. Nos
primeiros compases da década dos 2000 anotamos un día para a “Degustación de
orellas de porco” e un baile nocturno de disfraces, con premios individuais e a
parellas. Para o ano de 2008 destaca o nacemento do grupo As Flores do Carnaval
que máis adiante xa actúa e anima como a comparsa propia de Monte Porreiro,
exenta do concurso durante o desfile. Sen estendernos nas particularidades de
cada ano, a estrutura máis repetida dos principais eventos comprendería nestes
últimos tempos: a Presentación do Porco, o Festival Infantil, o Desfile de
Entroido e, dende 2014, a festa da Exaltación da Zorza.
No 2020 publícase, coma de costume, o programa mais
coa chegada da pandemia da COVID-19 o Entroido de Monte Porreiro suspéndese e
non se retoma até este ano no que o Porco, que no 2018 recibiría un intento de
bautismo co nome de Casimiro e que, noutra chiscadela anecdótica, chegou a ser
indultado do lume, volverá percorrer as rúas da barriada coa algarabía e a
troula a xeito de séquito do respectado animal.
![]() |
Capa do cartel e programa 2024 |
![]() |
Publicado no Diario de Pontevedra o 28/02/204 |
![]() |
(Foto cedida por Manuel Villaverde) |
Comentarios
Publicar un comentario